الأحد، 14 فبراير 2010

حدوتة مخوفانى




زمان وانا صغنونة

ماما حكتلى حدوتة وكنت بحب تحكيهالى

وكنت كل ما اكبر شويتين وافتكرها افهمها اكتر

اكيد حد عارفها

حدوتة الارنب اللى زهق من الجزر وراح يدور على اكل تانى

وملقاش اكل ينفعه تانى


بعد ملف كتير رجع ندمان لامه و بطل يقول لاء



اللى فهمته من الحدوتة دى ان اللى بيقول لاء على حاجة فى حياته

او يتمرد فى الاخر بيندم وبيرجع وهو غلطان وبيتأسف كمان



طب انا دلوقتى فى ايامنا دى هحكيها لبنتى؟؟


هفهمها ان اللى يقول لاء ويحاول يدور على حاجة احسن هيندم؟


هفهمها ان اللى يرفض ولو جزء بسيط من الواقع اللى عايش فيه

هيتعرض لمخاطر؟ هيتبهدل؟


هقولها انك لازم تعيشى زى ما الدنيا تقرر

ولا اعرفها انها لازم تختار حياتها وتقرر لنفسها ايه يريحها


ولا اقولها اللى بيمشى جمب الحيطة يبقا شاطر

طيب لو على ايامها مبقاش فى حيطة ؟

هتعمل ايه ؟ هتدعى عليا ؟:(

ياعالم اللى جاى شكله ايه


تبقا زى الطير اللى لو عنده جرح بسيط فى جناحه ميقدرش يطير

ويفترسه الاقوى؟


ولا اقولها اسمعى الكلام اللى يتقالك....

ولما تلاقى ان مبقاش فى كلام بيتقال؟

هتتصرف ازاى ؟؟


ولا اعلمها ان اللى بيسكت على حقه يبقا اهبل...

ولو حاولت تاخد حق ضايع منها ومحدش نصفها؟؟

هتقول عليا ايه؟


ولا نقول خليكى متسامحة

عشان حقوقها تضيع ؟


ولا اسيبها بقا تتعلم لوحدها


والله قلبى واجعنى عليكى اوى يا لارا



ملحوظة صغيرة

ممكن يكون الغلط عند الارنب انه مجربش حاجة تناسبه ورجع ندمان

طيب كان اكل خيار ولا كوسة يعنى موصوفله الجزر

7 اللى صبحو ومسو:

psycho يقول...

ممكن اكون الاول
تفسيرك جذبنى جدا جدا
تفسير فوق الرائع
انا احييكى على تفسير ملقيش اروع منه للقصه دى
عارفه
القصص بتناسب كل عصر
بس على شكل كل عصر
وشكل اللى فيه
دى دلوقتى مغزاها بقى كده فعلا
تحياتى لفكرك الجميل

psycho يقول...

ويشرفنى جدا انى اكون الاول

dr/shiko يقول...

اتفق معك يانيفين ... في خوفك علي ابنتك ولكن لازم نعلم ابنائنا ازاي يعرفوا ياخدوا حقهم من الدنيا وازاي يعرفوا يطوروا نفسهم بنفسهم وازاي يقدروا يفكروا ويشغلوا دماغهم عشان بكرة وبعده هما دول امل بلدنا انها تتطور بيهم ، والغلط اللي في مجتمعنا لازم نصلحه في ابنائنا والا حنفضل محلك سر ... انا ضد المشي جنب الحيط لانه حيجيبنا ورا اكتر واكتر .. ولكني في نفس الوقت اتفهم خوفك علي ابنتك ... ربنا يوفقك في تربيتها وتطلع مفيدة لنفسها ومجتمعها

dr/shiko يقول...

انا نسيت اعرفك بنفسي ... انا شيكو شريك في مدونة الرحالة http://alr7ala.blogspot.com/
وياريت نبقي اصدقاء وتزورينا وتشرفينا علي طول ... شرفنا بمعرفتك وزيارتك لنا ... شكرا لك

Cute Kitty **sookra يقول...

تعرفى يانيفين انا كمان خايفه وبفكر زيك تمام
خايفه موش عارفه ياترى هااعرف اربيها كويس واخلى قويه وتاخد حقها ولاضعيفه ولا ولا ولا ولا
اسئله كتير
مساكى شيكولاته

NeVeN يقول...

NeVeN يقول...
psycho
انا اللى اتشرف انك تكون الاول يا دايفد
انا معاك ان القصة ممكن تتفسر باكتر من شكل وميرسى على كلامك الجميل

dr/shiko

انا محتارة يا دكتور اعلمها تبقا نموذج صالح باى اسلوب ياعالم الاسلوب اللى هعلمها بيه هينفعها فى زمانها ولا هيتغير زى ما كل شئ بيتغير

اشكرك على تشريفك ليا



Little Kitty **sookra

ربنا يقدرك يا سكرة على تربيته بنتك بطريقة تنفعها وترضيكى يارب

نورتينى ياقمر وميرسى على الشيكولا

psycho يقول...

نورتى يا نيفين
واحب اجاوبك على سؤالك هنا
اولا اه
انا مختلف تماما
فى كتابتى للبوست
عن كتابتى للكومنت
اسلوبى فى الكومنت
لو بقى نفس اسلوبى فى القصه
الناس هتسترخمنى
خصوصا انى هستعمل كلمات رخمه ومكلكعه فى التعليق
وهبدو كانى تشارلز ديكنز او ناقد مشهور بيقول رايه
لكن على العكس
انا بسيط جدا فى تعليقى
ومش هيتعدى تعليق شاب فى العشرين او التمنتاشر من عمره
بس مش اكتر
اما سؤالك التانى
فالرد هيكون متاخر شويه
عشان منحرقش القصه
وشكرا ليكى على اهتمامك
يشرفنى ان يكون ليا متابعين زى حضرتك